Fréttablaðið, 5. janúar, 2008 (ritstjórnarsíða)

Sjálfhverfur prestur

Steindór J. Erlingsson

Torfi Stefánsson guðfræðingur tekur undir gagnrýni mína í gestapistli á bloggsíðu Halldórs Elíasar Guðmundssonar djákna.

Sr. Gunnar Jóhannesson tók upp hanskann fyrir Maríu í grein sem birtist einungis á visir.is.

Hjalti Rúnar Ómarsson svaraði gagnrýni sr. Gunnars í grein á Vantrúarvefnum

Á síðasta ári var talsverð umræða í samfélaginu um þátt kristinnar trúar í menntun barnanna okkar og aðkomu Þjóðkirkjunnar að grunnskólum landsins. Sjálfur er ég talsmaður þess að dregið verði úr vægi kristinnar „fræðslu“ í námi grunnskólabarna á kostnað veraldlegrar trúarbragðafræðslu. Einnig er ég eindregið á móti Vinaleiðinni, sem ég hyggst mæla gegn með því að styðjast við nýlega prédikun sr. Maríu Ágústdóttur, „Krafa Guðs“ (tru.is).

María segir að lesa megi úr Biblíunni að ástin á guði kristinna manna sé forsenda þess að geta borið hlýhug til náungans. Hún gefur í skyn að Jesú hafi verið ötull talsmaður þessa sjónarmiðs. Síðan segir hún: „Málið er ekki ‚bara‛ að elska Guð eða ‚bara‛ náungann, heldur er hvort um sig háð hinu. Án elskunnar til Guðs er erfitt að koma fram við fólk af kærleika“.

Það sem fyrst blasir við er að María gefur í skyn að trúleysingjar séu illa færir um að elska fjölskyldu sína og vini, sem endurspeglar álíka óupplýst ummæli biskupsins og annarra þjóna kirkjunnar um trúleysingja og trúleysi. Ummæli Maríu fela hins vegar í sér miklu breiðari skírskotun því hún segir blátt áfram að allir þeir sem ekki hafi meðtekið kristna trú eigi erfitt með „að koma fram við fólk af kærleika.“ Hér vegur María illilega að öllum þeim milljörðum einstaklinga sem ekki hafa meðtekið boðskap Biblíunnar.

Það er með ólíkindum að nokkur geti haldið fram viðlíka sjónarmiðum og María gerir, sem endurspeglar sjálfhverfuna sem innifalin er í flestum trúarbrögðum. Ekki dytti mér í huga að halda því fram að þar sem María byggir siðferði sitt á trú á guð, sem að öllum líkindum er ekki til, eigi hún erfitt með „að koma fram við fólk af kærleika.“ Ég amast ekki yfir því að María spúi þessu eitri óumburðarlyndis yfir söfnuð sinn en ég efast stórlega um að veita eigi henni og skoðanasystkinum hennar innan Þjóðkirkjunnar beinan aðgang að börnunum okkar innan veggja grunnskólans.

Í pistlinum segir Torfi m.a.: “Ég vil benda ykkur annálslesendum á grein sem Steindór J. Erlingsson skrifaði í Fréttablaðið í dag, 5. febrúar 2008. Þar gagnrýnir hann með réttu sr. Maríu Ágústsdóttur fyrir fullyrðingu hennar í predikun sem birtist á tru.is ... Steindór gagnrýnir þessa fullyrðingu á þeirri forsendu að sr. María sé með þessu að gefa ”í skyn að trúleysingjar séu illa færir um að elska” sína nánustu. Ég er sammála Steindóri í gagnrýni hans ... En sr. María er ekki sú eina sem gerir þessi mistök eins og Steindór bendir á. Mistökin ná alla leið upp í æðstu embætti íslensku þjóðkirkjunnar og gerir alla umræðu um þátt kristinnar trúar í menntun íslenskra ungmenna og aðkomu kirkunnar að grunnskólum landsins miklu erfiðari en þyrfti”.

HEIM