Erfðafræðilegi flóttamaðurinn umsetinn

Fréttablaðið og visir.is, Fim. 10. maí

Það vakti athygli þegar íslenskur fræðimaður varð tilefni forsíðufréttar í franska stórblaðinu Le Monde.

Þar var sagt frá því að Steindór J. Erlingsson, sem stundar doktorsnám í vísindasögu í Manchester, hefði lýst sjálfum sér sem erfðafræðilegum flóttamanni frá Íslandi í erindi sem hann flutti á ráðstefnu í París. Steindór segir að upphaflega fréttin hafi ekki alveg átt við rök að styðjast. Hann hafi sagt þetta í hálfkæringi í lok erindis síns þar sem hann gagnrýndi harkalega miðlægan gagnagrunn Íslenskrar erfðagreiningar. Fréttin hafi hins vegar farið í loftið og vakið athygli víða um heim.

,,Ég fékk fyrirspurnir frá um 30 erlendum blaðamönnum. Mér var boðið að koma til Ítalíu í þarlendan sjónvarpsþátt. Mér var boðið að koma til Sviss og nokkru eftir fréttina var mér boðið að koma til Japans í viðtal. Ef það gengi ekki voru þeir reiðubúnir að senda fréttamanninn til Englands að ræða við mig." Steindór hafnaði flestum þessum beiðnum en lét sér nægja að veita nokkur viðtöl í gegnum síma.

Fréttin var líka tekin upp hér heima og var það í fyrsta skipti sem flestir Íslendingar heyrðu nafn Steindórs nefnt. Steindór segir að þá hafi enginn íslenskur fjölmiðill sett sig í samband við hann en fréttin hafi þess í stað verið tekin hrá upp úr Le Monde án þess að fjallað væri um þá gagnrýni sem hann hefði sett fram í erindi sínu og hafi verið aðalefnið þó það hafi ekki skilað sér í fréttina. Því hefði verið auðvelt að líta svo á að hérna væri á ferðinni einhver vitleysingur að tala um það sem hann þekkti ekki til.

Nú hafa 19.800 manns sagt sig úr gagnagrunninum eða 7% þjóðarinnar og í hverri viku segja berast Landlæknisembættinu nokkrar úrsagnir. Steindór segir málinu langt í frá lokið enda standi Mannvernd að lögsókn þar sem lögmæti gagnagrunnsins verði kannað. Það sé mál sem kunni að fara fyrir Mannréttindadómstól Evrópu ef með þarf.