Morgunblaðið, 17. apríl 2001
HINN 6.
febrúar síðastliðinn hélt undirritaður erindi á ráðstefnu í París þar sem rætt
var um líftækni og áhrif hennar á samfélagið. Að ráðstefnunni stóðu
L'Association Diderot, sem er félagsskapur vísindafræðinga í Frakklandi, og
háskólinn í París. Á ráðstefnunni hélt ég erindi er í lauslegri þýðingu
nefndist:,,Hvernig stórfyrirtæki blekkti auðtrúa þjóð.`` Þar var blaðamaður frá
Le Monde sem hafði mikinn áhuga á erindinu og umræðum sem á eftir fylgdu. Gaf
hann sig á tal við mig og spurði hvort hann gæti fengið eintak af erindinu.
Kvað ég já við, hann fékk eintakið og ræddum við síðan örstutt saman. Eftir það
heyrðist ekkert í blaðamanninum fyrr en frá honum barst tölvupóstur 15. febrúar
þess efnis að ég yrði á forsíðu Le Monde daginn eftir!
Íslenskir
fjölmiðlar fjölluðu um málið, en ýmislegt í Le Monde-fréttinni var eigi á rökum
reist. Í erindinu var ég mjög gagnrýninn á íslensk stjórnvöld og Íslenska
erfðagreiningu og í umræðum að því loknu sagði ég í hálfkæringi að allt eins
mætti líta á mig sem erfðafræðilegan flóttamann, en ætlaðist auðvitað ekki til
þess að það yrði tekið bókstaflega. En viti menn, þetta var gert að meginefni
annars ágætrar fréttar. Ég er andvígur stefnu stjórnvalda í gagnagrunnsmálinu
en hef ekki flúið land. Eftir á að hyggja var þessi rangfærsla til góðs og
málstað Mannverndar mjög til framdráttar vegna þess að hún vakti nýjar umræður
um málið.
Eins og
bent er á í nýjasta Stúdentablaðinu höfðu íslenskir fjölmiðlar ekki samband við
mig. Í stað þess að spyrja af hverju óþekktur Íslendingur, sem að sögn Le Monde
taldi sig flóttamann, var á forsíðu eins helsta dagblaðs Frakklands fjölluðu
þeir um fréttina án þess að fylgja henni eftir. Hefði ég verið íslenskur
blaðamaður hefði mitt fyrsta hugboð verið að fréttin hlyti að vera vafasöm og
rétt að bera hana undir,,flóttamanninn``, því Íslendingar eru ekki á hverjum
degi á forsíðum heimspressunnar.
Ég vil
því ítreka að ég er ekki flúinn til Englands, ég er þar við nám. Rétt er einnig
að leiðrétta annan misskilning franska blaðamannsins. Í frétt Le Monde er sagt
að ég hafi orðið fyrir þrýstingi innan Háskóla Íslands vegna afskipta minna af
gagnagrunnsdeilunni. Þetta er rangt! Á ráðstefnunni gat ég þess að ég hefði
fengið ábendingar um að þessi afskipti mín yrðu mér ekki til framdráttar en þær
komu ekki frá Háskóla Íslands því eins og einn af mörgum vinum mínum innan
þeirrar stofnunar benti mér á væri það alls ekki lagt mönnum til lasts í
háskólanum að hafa skipt sér af deilunni um Íslenska erfðagreiningu á hvorn
veginn sem er.
Erindið
sem ég hélt verður gefið út í bók í Frakklandi í lok apríl, ásamt öðrum erindum
á ráðstefnunni og geta þeir sem vilja kynnt sér efni þess á ensku og frönsku á
heimasíðu minni. Slóðin er: www.raunvis.hi.is/~steindor/gagn.html.