Morgunblaðið, 14. október, 2009
Fræðslubæklingur
GSK um þunglyndi
Í FRAMHALDI af frétt
Morgunblaðsins í gær um að kvartað hafi verið til landlæknis vegna bæklings
GlaxoSmithKline (GSK) um þunglyndi þar sem í honum
væri gefið í skyn að lyf væru eina aðferðin til að lækna þunglyndi vill GSK á
Íslandi taka eftirfarandi fram:
„Bæklingur
GSK um þunglyndi var fyrst gefinn út árið 1999. Um var að ræða þýðingu á
dönskum bæklingi en leitað var faglegrar ráðgjafar og efnið staðfært í samvinnu
við íslenskan geðlækni. Á því tíu ára tímabili sem bæklingurinn hefur verið í
dreifingu hefur fyrirtækið ekki fengið neinar athugasemdir vegna innihalds hans
eða efnistaka fyrr en félagið fékk til umsagnar afrit af kvörtun dr. Steindórs
J. Erlingssonar til landlæknis fyrr á þessu ári. Í svarbréfi GSK á Íslandi til
landlæknis var tilkynnt að félagið myndi endurskoða bæklinginn og að á meðan sú
endurskoðun færi fram yrði frekari dreifing hans stöðvuð.
Frá því
bæklingur GSK um þunglyndi kom fyrst út hafa orðið margvíslegar framfarir í
meðferð þunglyndis bæði hvað varðar lyf og önnur úrræði fagaðila. Mikilvægasta
breytingin er þó hugsanlega sú vitundarvakning sem átt hefur sér stað um
þunglyndi og einkenni þess og að dregið hefur úr fordómum og fáfræði um
sjúkdóminn. Útgáfa bæklings GSK um þunglyndi hafði ekki hvað síst þetta að
markmiði.
GlaxoSmithKline er umhugað
að fræðsluefni á vegum fyrirtækisins endurspegli bestu vitneskju hverju sinni.
Fræðslubæklingur um þunglyndi var sá fyrsti sem gefinn var út af GSK hér á
landi um geðsjúkdóma og í kjölfar hans komu út bæklingar um ofsakvíða, áráttu-
og þráhyggjuröskun, almenna kvíðaröskun og geðhvörf. Samhliða endurskoðun á efni þunglyndisbæklings verður þetta fræðsluefni
nú einnig yfirfarið í samráði við innlenda sérfræðinga.“
Hjörleifur Þórarinsson
framkvæmdastjóri