Það er ráðgert að fara í gönguferð um Viðey laugardaginn 31. maí 2003 kl. 11:00-14:00.

Mæting er við landgang Viðeyjarferjunnar inni í Sundahöfn kl. 10:50 í seinasta lagi svo unnt sé að fara stundvíslega kl. 11:00 af stað yfir sundið (þá eigum við bókað far).

Til þess að komast að ferjunni er ekið niður Sundagarða og út eftir Klettagörðum (sjá símaskrá s. 818).

Ferð til baka er bókuð kl. 14:00 (kostar 500 kr. fram og til baka).

Hvað varðar mat og drykk eru þátttakendur beðnir að taka með sér nesti. Það á einnig að vera unnt að kaupa kaffi o.fl. í Viðeyjarstofu og sé veður gott má sitja þar utandyra. Landgangur ferjunnar er þar skammt frá.

Eftir að komið er til lands ætti því að vera nægur tími til þess að dusta af sér rykið, sinna daglegu amstri og gera sig fínan fyrir upphitun árgangsins kl. 17:00 síðdegis.

Samkvæmt upplýsingum ferjumanns liggja frammi bæklingar þar sem miðar eru keyptir í Sundahöfn. Samkvæmt upplýsingum Oddnýjar, eiginkonu ráðsmannsins í Viðey, á að vera unnt að ganga alla stíga í eyjunni, að einum fráskildum, vegna fuglavarps.