Whiskyblogg I
Jæja, er smám saman byrjaður að prófa single malt whisky tegundir Skotlands fyrir alvöru.Skotlandi má skipta í nokkra landshluta með tilliti til whisky-framleiðslu en hver landshluti er öðruvísi með tilliti til whiskysins sem þar er framleitt.
Gróflega séð er um að ræða:
Highlands
Lowlands
Speyside
Isle of Islay
Hinar eyjarnar
Ég ákvað að byrja að smakka single malt whisky tegundir Islay og hinna eyjana við vesturströnd Skotlands en ég komst að því loksins að það víský sem er mér að skapi er það sem er virkilega vel reykt en það einkennir einmitt Islay-whisky. Þar á eyjunni þurrka þeir maltaða byggið með því að brenna mó og þaðan er lyktin og bragðið að mestu komið. Ég held reyndar að reykta lyktin og bragðið sé það, sem fólk sem ekki er hrifið af whiský, þolir ekki við whiský.
Barþjónninn á whiskybarnum á whiskysafninu í Edinborg benti mér á Ardbeg whisky, 10 ára, sem dæmi um mjög vel reykt whiský og enn sem komið er, er það í mestu uppáhaldi hjá mér. Gríðarlega reykt og yfirgnæfir alla lykt, og bragð í byrjun, en smám saman byrjar maður að bera kennsl á annað í vökvanum, jafnvel smá kryddkeim. Hressandi eftirbragð.
Bowmore whisky, 12 ára, er einnig frá Islay og er elsta whiskyframleiðsla Islay og næstelsta í Skotlandi. Minna reykt en Ardbeg en meira af ýmsu öðru bragði. Man hreinlega ekki meir, þar sem það er dálítið langt síðan ég smakkaði. Þarf að prófa aftur, var gott alla vega.
Laphroig, 10 ára, er mjög skemmtilegt whisky. Minna reykt en ótrúlega bragðmikið. Þyrfti að smakka aftur almennilega.
Bunnahabhain, 12 ára, er mjög ótýpískt Islay whisky. Mjög lítið reykt og frekar sætt, bragðgott. Get svarið það að ég fann smá súkkulaðikeim.
Isle of Jura, 10 ára. Hér höfum við yfirgefið Islay eyjuna (og þar með whisky héraðið) og komin á aðra eyju, Jura. Af þessu whisky finnur maður ekkert reykt bragð. Allt í lagi en ekki mitt cup of tea.
Greinar
Við Ingvar, fyrrum leiðbeinandi minn, vorum rétt í þessu að senda inn handrit að tveimur vísindagreinum.Nú fara greinarnar í mat ritrýnenda og þá er bara að vona það besta.
sérstakt
Mikið rosalega tókst sérstökum saksóknara að koma illa út í viðtali í fréttum RÚV í kvöld. Sjá hérÉg fagnaði annars degi hins írska heilags Patreks á pöbbnum í gær með nokkrum nýjum og gömlum Pólverjum í gær (ég veit ekki af hverju ég kynnist bara Pólverjum en það er önnur saga), það var bara nokkuð gaman. Pólverjunum fannst annars mjög gaman af því þegar ég sagði þeim að Prins Póló skuli vera vinsælt á Íslandi.
Hlustaði á nokkra grunnnemendur flytja fyrirlestra um sérverkefni sem þeir hafa unnið í tölvuefnafræði á skrifstofunni hjá okkur seinustu mánuði. Erindin voru afskaplega misvond.
Þegar maður er í doktorsnámi og þarf að lesa fjöldann allan af vísindagreinum reglulega til að reyna gera eitthvað af viti, líður manni mjög oft eins og maður sé afskaplega heimskur og viti ekki neitt.
Í dag leið mér eins og ég vissi töluvert. Egó-ið hækkaði umtalsvert. Mennt er máttur.
landnám árið 700
Mbl.is. Landnám fyrir landnám.Vísir.is. Ísland numið árið 720 en ekki 874
Fyrir 3-4 árum síðan mætti ég á fyrirlestur efnafræðiskorar þar sem Páll Theodórsson, eðlisfræðingur, flutti mjög sannfærandi fyrirlestur um C-14 aldursgreiningar sínar og annarra á síðustu 30 árum sem miðuðu að því að komast að nákvæmlega hvenær landnám á Íslandi hófst. C-14 aldursgreiningar hafa lengi spáð fyrir um að elstu leifar mannabyggða séu frá árinu 700 eða þar um bil, sem er talsvert á skjön við Ara fróða eða um árið 874. Þetta hafa sagnfræðingar aldrei getað fallist á.
Þetta var einhver líflegasti fyrirlestur á málstofu efnafræðiskorar sem ég man eftir. Salurinn var troðfullur og ekki af efnafræðingum, heldur aðallega sagnfræðingum sem sumir voru orðnir ansi fúlir í lok fyrirlesturs. Í fyrirspurnarhlutanum tóku þeir sumir til máls og gátu engan veginn tekið þessi gögn í sátt, þá voru sumir mættir með eigin glærur og byrjaðir að halda sinn eigin fyrirlestur þarna. Allt var þetta mjög skemmtilegt.
Nú lítur út fyrir að ný fornleifagögn séu að koma upp sem geta staðfest þessar mælingar. Dálítið magnað.