Vísindin efla alla dáð

8000 pund!

Aðalskrifstofan heldur áfram að rukka mig um 8000 pund fyrir skólagjöldum, í þetta skipti með 10 daga viðvörun ella gripið verði til aðgerða.
Þetta er ábyggilega af því að ég er Íslendingur.

Nýtt lágmark

Fann nýtt lágmark fyrir vanadíum kófaktorinn í gær sem prófessorinn hafði bara aldrei séð áður og ætti ekki að vera til.
Djöfull er ég öflugur.

...

Farinn að venjast Nes-kaffinu... guð hjálpi mér...

nýtt look

Það var kominn tími á nýtt look

jæja

Jæja, er bráðum búinn að búa í Skotlandi í tvær vikur og líkar bara vel. Líkar ágætlega við skólann, smá munur að vera í efnafræðibyggingu þar sem mjög auðvelt er að týnast og þú sérð nýtt fólk á hverjum degi.
Búinn að fara á nokkrar málstofur (spurði meira að segja spurninga) og líkar almennt við andrúmsloftið. Helsti gallinn við umskiptin frá því að vera framhaldsnemi á Raunó er hins vegar kaffið. Að fara úr kaffivél sem malar á staðnum (Raunó) gæða Kaffitár-baunir yfir í það að borga 25 pens fyrir Nes-kaffi úr sjálfsala er náttúrulega glatað. Mig grunar að ég kaupi kaffivél fyrir skrifstofuna fljótlega, þetta gengur ekki.
Fólkið á skrifstofunni er ágætt, tveir pólskir doktorsnemar, asískur doktorsnemi (man ekki hvaðan), franskur póstdokk og svo tveir skoskir sérverkefnanemar. Þetta eru sem sagt tölvuefnafræðigrúppur skólans en prófessorarnir eru tiltölulega nýbyrjaðir við skólann og eru því smám saman að byggja upp tölvuefnafræðideild hérna. Ég er fyrsti doktorsnemi prófessors míns síðan hann fékk stöðuna í byrjun árs.
Fyrri doktorsnemi prófessorsins (frá Þýskalandi), indversk stelpa, var í heimsókn um daginn að kenna mér á reikningana sem ég mun framkvæma. Hef sjálfur ágæta reynslu að reikna litlar sameindir, ca. 25 atóm, en það er dálítið öðruvísi að vera allt í einu að meðhöndla 15þús atóma sameind.
Er akkúrat núna að dúndra inn eins mörgum vatnsatómum vatnssameindum* í prótein sem ég er með.
Já prótein. Ég er kominn í lífefnafræðina aftur. Hálf undarlegt. Reyndar málmprótein. Sé eftir því núna að hafa ekki fylgst meira með í Lífefnafræði 1 á sínum tíma, og jafnvel að hafa ekki tekið próteinkúrsinn hans Magnúsar Más; hefði komið sér vel núna. Jæja, nóg í bili.

* Úff, þetta er ekki í fyrsta skipti sem ég geri þetta.

Skotland

Jæja, reynslan sýnir að ég er duglegri við að blogga þegar er í útlöndum (sbr. Kanadadvöl) og ég ætla því að láta á það reyna á nýjan leik.

Ég er sem sagt fluttur til Skotlands í doktorsnám. Kláraði MS námið mitt með fyrirlestri og ritgerð í lok ágúst og útskrift í október. Gekk það allt mjög vel.
Ég er nýfluttur til St Andrews, 18 þúsund manna sjávarþorps í Skotlandi, aðeins norðar en Edinborg.
Kom til landsins á sunnudag og fór með lest frá Glasgow til St Andrews á mánudag. Gleymdi mér aðeins í lestinni og kynntist Dundee í nokkrar mínútur áður en tók svo lestina til baka.

Er búinn að vera hérna núna bráðum viku og hlutir hafa almennt gengið vel. Skráði mig formlega inn í nám í gær, með útfylltu formi sem sýndi að ég væri að hefja nám og að hluti skólagjalda yrði borgað úr styrk prófessorsins. Maðurinn í afgreiðslunni sagði að þetta væri allt gott og vel og bað mig svo um restina af skólagjöldunum eða 7000 pund. Ég var ekki með það í veskinu þannig að ég fór á deildarskrifstofuna og lét redda þessu með skólagjöldin fyrir mig.

Fór líka og opnaði bankareikning í gær, valdi Bank of Scotland. Það gekk ágætlega fyrir sig þar til ég sýndi konunni vegabréfið mitt og sá að ég væri frá Íslandi. Þá ákvað hún að fara fram og tala við æðri völd. Þegar hún kom aftur fékk ég annan þjónustufulltrúa.
Undarlegt, kannski var hún með reikning í Icesave.

Sit núna að reyna læra að meðhöndla risasameindir í CHARMM forritinu af indverskri stelpu sem er doktorsnemi að klára verkefni sitt en ég mun nokkurn veginn taka við því verkefni.

Meira síðar