Mentos og kók - stórhættuleg blanda
...eða þannig...Powerpoint skjal með hræðsluáróði um Mentos og Coca Cola fer nú sem eldur um sinu í tölvupósti fólks. Fékk ég einn slíkan rétt áðan. Flökkusögur hafa sjaldan áður öðlast jafn mikla útbreiðslu síðan Internetið varð til og það er fjarri því að vera gott. Umrætt Powerpoint-skjal
Skjalið inniheldur upplýsingar um 10 ára strák frá Sao Paulo, Brasilíu sem veiktist og dó skyndilega eftir að maginn hans sprakk eftir að hafa innbyrgt bæði Coca Cola Light og Mentos. Þetta er sett fram á dramatískan hátt à la Powerpoint og svo er sagt frá vísindamanninum Alexander B. Mergenthaler frá efnafræði-institútinu l'Institut USP (France) sem rannsakaði þetta og komst að því að Acesulfame K INS930 þegar það kemst í snertingu við Mentos-efni þá á sér stað stórhættulegt efnahvarf með hið dramatíska nafn Ta9V4 sem veldur gífurlegri gasmyndun og sprengingu.
Þrátt fyrir mikla fjölmiðlaumfjöllun (það efast ég ekki um, alla vega ekki í USA) þá hafa Coca Cola og Mentos fyrirtækin ekki viljað tjáð sig um þetta mál.
Fyrir það fyrsta þá er ómögulegt að rekja umræddan atburð til Sao Paulo sem ekki tengist umræddu Powerpoint skjali.
Vísindamaður að nafni Alexander B. Mergenthaler er ekki til nema mögulega einn í Japan sem fæst við arkitektúr skv. Web of Science.
l'Institut USP (France) finn ég ekkert um en þess má geta að University of Sao Paulo (USP) er til.
Acesulfame K INS930 er sætuefni sem m.a. er notað í sykurlausa gosdrykki. Það hefur E og INS númer 950 skv. Evrópusambandinu, Matvælaeftirlitsstofnun Sameinuðu Þjóðanna og Alþjóða heilbrigðistofnunni. Ef ýta á undir kemófóbíu fólks (órökræna hræðslu við efni) þá er alltaf gott að bæta við nokkrum bókstöfum og tölustöfum til að gera fólki ljóst að hér sé örugglega um ljótt tilbúið kemískt efni sem líklegt er til að valda þér eins miklum skaða og það getur. INSnúmerið er hins vegar af einhverjum orsökum rangt hér, 930 í stað 950.
Efnafræðingar eru sjálfselskupúkar sem skíra efnahvörfin sín eftir sér sjálfum og myndu ekki skíra efnahvarf með því ljóta og merkingarlausa nafni Ta9V4 . Tetravanadín-nonatantalum ??
Efnafræðin er svo frekar léleg. Effektinn við að setja mentos í Coca Cola Light (sjá t.d. hér) er sá sami og að setja í Coca Cola (sem inniheldur ekki asesúlfam K) og því er þetta ótengt asesúlfam K. Í rauninni er ekki um að ræða efnahvarf heldur frekar eðlisfræðilegan effekt sem hefur að gera með hrjúf yfirborð og losun uppleystra gastegunda úr vökvum. Vísindavefurinn er með góða úttekt á þessu. Sjá hér
Maginn er ekki að fara springa. Nóg af matarleifum og slíku er í maganum sem myndi hafa svipuð áhrif og mentos varðandi losun gastegunda og þetta tekur maður meira að segja eftir þegar maður drekkur gos. Sögur eins og þessar um springandi maga hafa verið til í mörg mörg ár og hafa ávalt reynst vera flökkusögur sem ekkert er til í. Ég gæti þó giskað á að þröngva mikið af mentosi og gosi ofan í sig í einu sé ekki mjög þægilegt.
Eru Bandaríkjamenn trúaðri en páfinn í Róm ?
Merkilegt.Sjá hér
The Secret
Er þjóðin dottin á hausinn ?Náttúrulækningar
Vísir.is: Tourette-einkenni hurfu eftir náttúrulækningarVísir.is:Landlæknir sáttur við náttúrulækningar
Er ekki í allt í lagi ? Skulum ekki gleyma hvað homeopatía er: spekin við að þynna efni það mikið út að ekkert er eftir af því og græða á því að selja vatn með innbyggðum placebo-áhrifum.
Það er afskaplega sorglegt að landlæknir taki ekki skýrari afstöðu til svo kallaðra náttúrulækninga eins og homeopatíu. Homeopatíulyf eru vissulega skaðlaus (innihalda ekkert) en svo sannarlega er verið að plokka peninga af fólki.
Uppfært: Eftir að hafa horft á Ísland í dag þáttinn þar sem viðtal var við móður barnsins með Tourette einkennin er ég reyndar farinn að efast um að homeopatíulyf hafi komið eitthvað við sögu þótt það komi reyndar fram í Vísis-fréttinni. Mér sýnist eins og manneskjan hafi ákveðið að setja barn sitt á hollt mataræði (sem einkennist reyndar af dálítilli kemófóbíu og ofurtrú á allt sem er lífrænt ræktað en hvað um það) Af hverju hefur enginn sagt mér áður að það að borða hollan mat geri manni gott ? Þetta er stórfrétt !
En fyrst ég byrjaði að tala um homeopatíu þá mæli ég samt eindregið með myndskeiðinu fyrir neðan sem er úr BBC-heimildarþætti sem sýnir á mjög skýran hátt hvurslags bull og vitleysa þetta er sem við erum að tala um og hvílík móðgun við fræðigreinina efnafræði.