SMI: Small Molecule Investigation
Mjög fyndið myndband, sérstaklega fyrir efnafræðinga sem hafa horft á a.m.k. einn CSI þátt um ævina:Sjá hér
Ég skal alveg viðurkenna að ég grenjaði úr hlátri yfir þessu.
Hvað komast margir efnafræðingar fyrir í stinkskáp ?
Þessu hef ég lengi velt fyrir mér en þetta er nú komið í ljós:Ráðstefna
Kom heim frá ráðstefnu á föstudaginn, 12th European Symposium on Gas Electron Diffraction sem haldin var í Blaubeuren í Suður-Þýskalandi en öll ólífræna grúppan skellti sér þar sem við vorum með eitt erindi og tvö veggspjöld. Gas Electron Diffraction er mælitækni sem við höfum verið að nýta okkur og sent sýni út í mælingar.Þær hafa verið annasamar síðustu vikur fyrir ráðstefnuna en ég lenti í að framkvæma ansi marga tölvureikninga á þeim sameindum sem smíðaðar hafa verið og mældar síðustu ár hjá okkur og setja svo saman veggspjöldin sjálf sem fóru svo í prentun deginum áður en við fórum út.
Afraksturinn má annars sjá hér, fyrir áhugasama: Fluoromethyl og Silacyclohexanes
Við lentum í Þýskalandi á laugardegi, í krummaskuðinu Frankfurt-Hahn (sem á fátt skylt við Frankfurt) þar sem við gistum eina nótt og keyrðum svo suðureftir í gegnum Mosel-dalinn og svo eftir Autobahn niðureftir. Komum við í Heidelberg í örstutta stund (sorrí Bjarki, vorum of sein að fatta).
Ráðstefnan var svo bara mjög fín, í minni kantinum sem var kostur (undir 100 manns). Þarna hittust allir helstu Gas Electron Diffraction menn í Evrópu og einnig vísindamenn sem tengjast mælitækninni óbeint (efnasmiðir, teoretíkerar o.fl.). Flestir voru frá Rússlandi, Skotlandi og Þýskalandi en Skotarnir voru sérlega skemmtilegur hópur sem gaman var að spjalla við.
Við hófum ráðstefnunni á því að lenda á ágætu fylleríi við þá strax á fyrsta kvöldi.
Erindin voru mörg ágæt, sum illskiljanleg af þeirri ástæðu að mann skorti þekkingu en önnur illskiljanleg vegna slæmrar enskukunnáttu fyrirlesara.
Mjög fyndið var að fylgjast með "rifrildi" sem hélst út alla ráðstefnuna en það var hvernig experimentalistar og teoretíkerar gátu rifist um aðferðirnar sínar en það voru stöðug skot á báða bóga.
Heimkoman varð svo því miður flóknari en hún hefði átt að vera. Iceland Express var það indælt að flýta flugfarinu okkar heim um 10 tíma án þess að segja okkur þannig að við misstum að sjálfsögðu af fluginu. Við fengum svo þá hugmynd að halda bílaleigubílnum okkar lengur á leigu og keyra til Kaupmannahafnar alla nótt og ná flugi þaðan heim, sem við svo misstum af líka (hefðum þurft 20 mín í viðbót), þannig að við skráðum okkur í þriðja flugið sem var um kvöld frá Kaupmannahöfn. Ég held ég reyni þetta ekki aftur.