Vísindin efla alla dáð

afmæliskveðja til mín

Fólkið á hæðinni minni hefur mjög undarlegt tímaskyn eða mjög undarlegan húmor. Þegar ég kom að herberginu mínu um 5-leytið í dag eftir dvöl í tölvuverinu dágóða stund, hékk þar á hurðinni stórt og mikið plakat þar sem stóð "Happy birthday Ragnar" í öllum regnbogans litum og við plakatið var búið að hengja nokkuð stóran og vel unninn origami-fugl sem á stóð að væri "birthday stork". Þegar ég fór á salernið svo stuttu seinna óskaði einn mér svo til hamingju með daginn.

Afmæli mitt var 2. júlí síðast liðinn þannig að þetta er að missa marks nema ég fékk reyndar bréf um það í upphafi annar frá hæðisstjóra um að ákveða dagsetningu um hvenær best væri að halda upp á 'fake-birthday' mitt, tilboði sem ég hafnaði. Kannski var 'fake-birthday' mitt ákveðið fyrir mig.

Nú veit ég reyndar að flestir á hæðinni álíta mig vera furðufugl af einhverjum ástæðum þar sem ég er voða lítið að mingla við fólkið á hæðinni (17-18 ára fólk eru börn sem ekki er hægt að tala við, sorrí systir) og þeim finnst nafnið mitt vera mjög skondið en ég heyri það sagt fram á gangi oft á tíðum þeim til gamans (þá borið fram 'Raynor'). Þá hef ég einnig fengið ýmsar ástarjátningar í gegnum tíðina á tússtöfluna mína sem er einnig á hurðinni minni en þetta er allt saman mjög furðulegt.

Það er spurning hvort ég fari að stinga upp á eineltisfundi við hæðisstjórann minn.

Flókin efnasmíði: moenomycin A

Efnafræðingum hefur tekist að smíða sýklalyfið moenomycin A í fyrsta skipti "from scratch" en það tók bara um 30 ár. Þegar litið er á byggingu efnisins er það vissulega skiljanlegt hvers vegna þetta tók svona langan tíma en efnið hefur einfaldlega djöfullegan strúktúr. Ég myndi sjálfsagt byrja gráta ef ég fengi NMR-róf af þessu og skipað að greina rófið.
Moenomycin A er ensímhindri á transglycosylase ensím sem eru nauðsynleg fyrir myndun peptíðóglýkan frumuveggs í bakteríum.

"Moenomycin has an unusual structure, and one reason we chose to try to synthesise it simply has to do with the challenge of putting it together"....ókei....

Lífrænir efnafræðingar eru skrýtnir...
Sjá frétt á Chemistry World

Annað (varúð...tuð í minni kantinum):
Sendi fax upp á Hagstofu áðan þar sem ég óskaði eftir skráningu utan trúfélaga. Vonandi gengur það eftir en 1. desember er síðasti séns til þess að gera það til að skráning fyrir árið 2007 sé rétt. Styrki með þessu Háskólann um rúmlega 10000 kr á ári á kostnað Þjóðkirkjunnar; sál minni líður betur.

kanadíski hreimurinn

Miðað við mín kynni af Kanadamönnum eftir um 3 mánaða dvöl hérna er að hreimur þeirra er almennt mjög á við hreim venjulegs Bandaríkjamanns (hvort það hugtak sé til er annað mál) en þá er ég að meina tiltölulega eðlilega bandaríska ensku eins og maður heyrir í bíómyndum og sjónvarpi.

Þó er einn (alla vega) greinilegur munur á tungumáli Kanadamanna og Bandaríkjamanna sem ég í fyrstu tók ekkert eftir en er nú farinn að taka eftir hjá nánast hverjum manni, en það er hvernig þeir bera fram "ou"-hljóðið í orðum eins og "about", "house", "out" o.s.frv.
Bandaríkjamenn myndu segja þessi orð svona (ef við miðum við íslenska stafsetningu): "abát", "hás", "át".
Kanadamenn hins vegar segja hins vegar eitthvað allt annað. Þeir myndu segja "abeoot", "heoos" og "eoot" og það er ekki einu sinni nóg að skrifa þetta svona til að útskýra almennilega hvernig þeir bera fram þetta hljóð. Kannski er þetta frekar "abeout", "heous" og "eout", ég er ekki viss.

Það er mjög sérstakt að fylgjast með þessu því miðað við þá ensku sem maður þekkir þá stingur notkun þessa hljóðs á þennan veg rosalega í ... eyrun...

Annað sem er sérstakt varðandi tungumál hér er hvað það getur verið rosalega mikill munur á ensku-kunnáttu Kanada-Frakka, þ.e. fólk sem á frönsku að móðurmáli og koma flestir úr Quebec-héraði sem er hérna hinum megin við ána. Sumir virðast fullkomlega færir á bæði tungumál og oft á tíðum hefur það komið mér á óvart að uppgötva að sumir sem ég taldi fyrir víst að væru Kanadamenn með ensku að móðurmáli, hafa í raun frönsku að móðurmáli. Þeim tekst að fela frönskuna fullkomlega, alla vega fyrir mér.
Aðrir eiga í miklum erfiðleikum, jafnvel með að skilja ensku og hvað þá tala, mér leið eins og ég væri að tala við Manuel (Fawlty Towers, ef einhver þekkir) þegar ég var að spyrja manninn í tölvubúðinni um hvers vegna tölvan mín væri ekki enn komin.

Gúrkutíð hjá Mbl.is ?

Stúdentar önnum kafnir í próflestri

Ekki grunaði mig að hægt væri að búa til heila frétt um þetta.
Ætli þeir komi með þessa frétt í lok hverrar annar ?

The Fountain

Sá stórkostlega kvikmynd í kvöld, The Fountain eftir hinn skemmtilega leikstjóra Darren Aronofsky sem gerði myndirnar Pí og Requiem for a Dream. Hef beðið eftir þessari mynd í nokkur ár þegar Aronofsky ætlaði fyrst að gera hana en þá voru í aðalhlutverkum Brad Pitt og Cate Blanchett. Einhver listrænn ágreiningur átti sér hins vegar stað milli Pitt og Aronofsky þannig að myndin var lögð á ís en var árið 2004 aftur tekin upp og leikararnir Hugh Jackman og Rachel Weisz ráðin í aðalhlutverk.
Myndin spannar 1000 ár og er um 3 mismunandi sögur manns sem allar tengjast. Meira ætti í raun ekki að segja um söguþráðinn en ég mæli með trailernum. Sjá hér

Eins og með fyrri kvikmyndir Aronofskys leggur hann mikinn metnað í útlit myndarinnar og tónlist og er unun að horfa og hlusta á það sem fyrir augu og eyru ber. Leikarnir eru mjög góðir og var hin frábæra Ellen Burstyn með smá aukahlutverk en hún lék mömmuna eftirminnilegu í Requiem for a dream og fékk Óskarstilnefningu fyrir. Þess skal reyndar geta að hinir Íslendingarnir 4 voru mér flestir algerlega ósammála um gæði þessarar myndar sem segir okkur kannski að þessi mynd er ekki fyrir alla.

Meira um trúfélagsskráningu

Ég bara get ekki alveg hætt að tala um þetta strax.

Samkvæmt foreldrum mínum var sent inn plagg um að ég væri utan trúfélaga ásamt blöðum systkina minna þegar ég flutti til Íslands eftir 10 ára dvöl í Svíþjóð. Það verður fróðlegt að sjá hvernig systkini mín eru skráð en þau voru fædd í Svíþjóð og send inn plögg um að þau væru utan trúfélaga þegar við fluttum til Íslands.

Á þetta að heita trúfrelsi ?

Detti mér allar dauðar lýs...

Ég ákvað eftir lesturs þessarar bloggfærslu að athuga trúfélagsskráningu mína. Það er nefnilega hið minnsta mál, nóg er að senda fyrirspurn í gegnum vef Þjóðskrár og maður fær svo tölvupóst til baka. Sjá hér

Ég átti ekki von á öðru en að ég væri skráður utan trúfélaga.
En það er svo skemmtilega írónískt að þetta er svarið sem ég fékk í dag með tölvupósti:
"Sæll. Þú ert skráður í Þjóðkirkjuna."

!

Ég er ófermdur, óskírður og foreldrar mínir hafa alltaf fullvissað mig um að ég sé utan trúfélaga. En í ljósi þessara upplýsinga þá lítur út fyrir að Ragnar, heiðingi og raunvísindanemi með meiru, hefur verið með skattpeningum sínum að halda uppi hindurvitnabákni ríkisins frá upphafi og verið partur af 84 % tölunni sem kirkjunnar menn nota til að sýna fram á hvað Íslendingar eru góð kristin þjóð.

En hvernig stendur á þessari skráningu minni ? Á þetta ekki að virka þannig að við skírn er barnið skráð inn í viðkomandi trúfélag, þegar það fermist er skírnin staðfest og barnið heldur áfram að vera í trúfélaginu en ef ekki þá hættir það að vera í trúfélaginu ?
Þetta var að sjálfsögðu gríðarlega bjartsýnisleg spurning, en maður hefði samt haldið að eina leiðin til að vera skráður í Þjóðkirkjuna er að skírast eða fara og skrá sig formlega í Þjóðkirkjuna. Er það ekki sæmilega réttlátt alla vega ? Eiga ekki foreldar að sjá um að skrá börn sín í trúfélög frekar en að þurfa standa í því að skrá þau úr þeim ?

Maður hefði haldið það en Þjóðkirkjan er lúmskari en svo. Barn er nefnilega við fæðingu skráð í sama trúfélag og móðir þess (sjá Alþingislög) og þetta virðist vera meginástæða þess hvað ótrúlega hátt hlutfall Íslendinga er í Þjóðkirkjunni þrátt fyrir að Íslendingar séu ekki mjög kirkjurækin þjóð.

Einhvern veginn er ég alla vega skráður þótt mér þyki nú ekki líklegt að foreldrar mínir hafi klúðrað svona löguðu þótt mamma hafi verið skráð á tímabili. Væntanlega er þetta misskráning af einhverju tagi en ef svo er þá þykir mér það nokkuð alvarleg misskráning.

Það er spurning hvað ég geri restina af deginum, ég hef lifað í þeirri trú að ég sé heiðingi og að sál mín fari til vítis, skyldi það vera til, en kannski þýðir þessi skráning mín að guð accepteri mig sem kristinn og að sál mín eigi sér von eftir allt saman. Kannski ég fari að horfa á heiminn öðrum augum eftir þetta og láti skráninguna bara standa. Eða ég fari og prenti út úrskráningareyðublaðið og faxi þetta heim til Hagstofunnar.

Hvet fólk til að tékka á trúfélagsskráningu sinni á vef Þjóðskrár
Eyðublað um úrskráningu má svo nálgast hér , sem faxa má til Hagstofunnar í síma 569-2949

Íshokkíleikur

Íshokkíleikurinn var magnaður. Ekkert hefði getað búið mig undir þessa upplifun. Ég hafði varla ímyndað mér hvernig leikvangurinn sjálfur kæmi til með að líta út en hann var ótrúlega stór og gríðarlegur halli á áhorfendabökkum. Við vorum nokkurn veginn efst en útsýni niður á völl var samt gríðarlega gott. Áður en leikur hófst var mikið ljósashow þar sem myndum var varpað á ísinn sjálfan og ég veit ekki hvað og hvað.
Íshokkí er töluvert skiljanlegri íþrótt en amerískur fótbolti, og maður hefur náttúrulega spilað inni-bandý þannig að leikreglur vöfðust ekkert mikið fyrir manni. Það var þó ýmislegt sem kom á óvart eins og t.d. það að leikmenn geta allt í einu ákveðið að fara að lemja hvorn annan og allt í einu er leikurinn búinn að breytast í hnefaleikakeppni milli tveggja manna á meðan dómarar sitja og horfa á og leyfa þessu að klárast. Að lokum reka þeir svo kannski báða menn út af og láta leikinn halda áfram.
Þetta er víst alls ekki óalgengur partur af íshokkí en þetta kom manni töluvert spánskt fyrir sjónir. Leikurinn getur einnig orðið nokkuð grófur en menn dúndra gjarnan inn í hvorn annan með öllum skriðþunga þegar menn berjast um pökkinn í hornunum.

Leikurinn var svo bara mjög spennandi framan af, en undir lokin tóku okkar menn (Ottawa Senators) smá forskot og kláruðu dæmið svo 4 -1 sem telst góður árangur miðað við að andstæðingurinn Buffalo er í 1. sæti deildarinnar eða eitthvað svoleiðis.

Þetta var eftir allt saman ekkert mjög ólíkt bandý, ég held ég gæti orðið góður í íshokkí, verst að ég kann ekkert á skauta.

á réttum kili

Tilraunin heppnaðist (nr. 2). Ég er nú vakandi, hress og kátur og að öllum líkindum búinn að snúa sólarhringnum mínum við.

Í dag fæ ég að kynnast þjóðaríþrótt Kanadamanna að alvöru. Farið verður á íshokkíleik: Ottawa Senators vs. Buffalo Sabres

Þetta verður spennandi.

sólarhringurinn

Það er komið allt of mikið um trúmál á þessum vef... ég verð að laga þetta. Trúmál vekja vissulega áhuga minn en fyrr má nú vera.

Um annað:
Ég var mjög ánægður með mig þegar ég ég saumaði tölu í buxurnar mínur í dag. Ég lenti nefnilega í því leiðinda máli að talan losnaði úr buxum mínum, þetta gerðist þegar ég var í New York í byrjun september. Ég leysti málið með að kaupa mér nýjar buxur fyrir nokkrum vikum sem hefur lagað þennan buxnavanda en ákvað að nú gengi þetta ekki lengur og með hjálp Esterar sem var svo gáfuð að koma með nál og tvinna með sér, tókst mér eftir 30 mínútur að sauma töluna á buxurnar. Handavinnukennarinn minn gamli yrði stoltur af mér... eða kannski ekki...

Ég sit nú kl. 3 að nóttu, skrifandi þetta og drekkandi bjór. Aldrei þessu vant þá er ég að drekka bjór með þó nokkuð göfugan tilgang. Mér hefur nefnilega tekist að snúa sólarhringnum mínum það mikið við (þökk sé prófi í NMR-fræðum) að ég get ekki sofnað fyrr en um kl. 9-10 að morgni næsta dags og vakna þar af leiðandi um kl. 5-6 að kvöldi. Þetta gengur náttúrulega ekki til lengdar. Ég hef reynt ýmis úrræði en sé einungis tvo mögulega kosti til að laga þetta:
1. sleppa svefni í eina nótt eða
2. drekka mig í svefn með bjór.

Númer tvö er sennilega að hafa vinninginn. Mig er farið að syfja þó þetta hafi ekki verið ætlunin frá byrjun. Ég uppgötvaði að bjórinn sem ég er að drekka er þó nokkuð sterkur, yfir 7 %, en þetta er Holsten Festbock sem ég ákvað að drekka í kvöld til heiðurs föður mínum sem hringdi í mig í dag sem var vissulega fallega gert, en ég veit að hann er hrifinn af þessum bjór.

Kristilegir predikarar

Ég nefndi um daginn kraftaverkakallinn Peter Popoff sem James Randi afhjúpaði svo snilldarlega.

Annar kraftaverkakall og predikari er Benny Hinn sem er enn þekktara nafn í Jesú-heiminum. Maður man vel eftir honum á sjónvarpsstöðinni Ómega. Hann er hins vegar enn meiri svikahrappur ef eitthvað er. Ég mæli með fyrir þá sem áhuga hafa að skoða þennan 40 mín. heimildarþátt kanadísku CBC-sjónvarpsstöðvarinnar. Sjá hér

Annar þekktur predikari sem ég sá á heimasíðu Ómega að er enn til sýningar hjá þeim, er Jimmy Swaggart sem merkilegt nokk hefur tekist að snúa baki við fortíðinni, því á hátindi ferils síns sem predikari fyrir um tuttugu árum heimsótti hann vændiskonur mikið þar til það komst upp. Fræg er ræða hans þar sem hann grét í beinni útsendingu og bað söfnuð sinn og Guð afsökunar.Sjá smá myndskeið hér. Hann fór í gegnum svipað ferli og Ted Haggard er að fara í gegnum núna, en virðist þó hafa gert mál sín upp við Guð fyrir utan smá feilspor bæði 1991 og 1997 þegar aftur komst upp að hann hafði verið að heimsækja vændiskonur.

Svyturys- æðislegur bjór

Eftir að hafa prófað hátt í 50 mismunandi bjórtegundir, bæði í kanadíska ríkinu og hverfispöbbunum hefur mér tekist að finna eina bjórtegund sem mér finnst einfaldlega framar öllum hinum.

Ég er að sjálsögðu að tala um Svyturys Extra sem er litháenskur bjór framleiddur af Svyturys bruggfyrirtækinu sem hefur verið starfrækt síðan 1784. Svyturys bruggar 9 mismunandi bjóra en ég hef bara getað bragðað á Ekstra bjórnum sem ég fann hérna í LCBO sem er hið kanadíska ÁTVR.
Svyturys Extra, sem var fyrst búinn til árið 1995 er vinsælasti bjór Litháens og litháenska þjóðin virðist stolt af honum. Hann hefur fengið gull- og silfurverðlaun á þekktum bjórkeppnum á við World Beer Cup og World Beer Championship.
Ég er orðinn mikill aðdáandi þessa bjórs og er farinn að versla hann eingöngu. Hann virðist henta mínum bragðlaukum sérlega vel.
Ég veit ekki hvernig ég á að fara að þegar ég kem aftur heim til Íslands og get ekki lengur verslað mér Svyturys Extra.

Vinaleið í Kastljósi

Það var ótrúlegur málflutningur Hilmars Ingólfssonar, skólastjóra Hofsstaðaskóla í Garðabæ þegar rætt var um Vinaleiðina þar í skólanum, sem hver maður með eitthvað vit í kollinum sér að er ekkert annað en trúboð.
Kastljósþáttur 14. nóv

Það var furðulegt að fylgjast með tveimur starfsmönnum skóla í þættinum (hinn var Jóhann Björnsson kennari og stjórnarmaður í Siðmennt) hafa svona allt öðruvísi skoðanir á hvernig fræðslustarf grunnskóla eigi að fara fram. Sér skólastjóri Hofsstaðaskóla virkilega ekkert athugavert við það að ef ráðnir eru skólaprestar til starfa að þá sé verið að stunda frekar róttæka trúarinnrætingu í skólanum ? Af hverju má skóli ekki vera hlutlaus, fjalla um trúarbrögð á eðlilegan, hlutlausan hátt og leyfa foreldrum að sjá um trúarlegt uppeldi barnanna sinna ?
Hvers vegna ætti grunnskóli að vera tengdur kristinni trú frekar en annarri trú ? Við lifum í þjóðfélagi þar sem að ýmis konar trú er stunduð og það segir sig sjálft að eina réttláta leiðin er að skólinn sé hlutlaus með tilliti til trúarbragða.

Sjá einnig fyrri skrif um Vinaleið

Uppfært: Gunnlaugur Þór Briem er með frábæra grein um Vinaleiðina á bloggi sínu þar sem hann lýsir mjög vel öllu því sem er að þessari Vinaleið á betri hátt en ég gæti nokkurn tímann gert. Sjá hér

Samtök gegn bökuðum rúsínum

Í ljósi fyrirspurna síðustu daga á samtökum gegn bökuðum rúsínum tilkynni ég hér með að komin er upp vefsíða fyrir Samtök gegn bökuðum rúsínum

Samtök þessi hafa lengi verið óformlega til en nú er komin tími á að samtökin láti til sín taka í þjóðfélaginu og það fyrsta á dagskrá er uppsetning vefsíðu samtakanna sem verður hýst sem undirsíða þessa vefjar til að byrja með.

Nú er tími á að allir þeir sem óbeit hafa á bökuðum rúsínum komi út úr skápnum og viðurkenni það opinberlega að það er í lagi að vera á móti bökuðum rúsínum í mat. Alvarleiki málsins er ekki minni en svo að læknir og tveir lífefnafræðingar viðurkenna allir þennan vanda í þjóðfélaginu og eru félagar samtakanna.

Samtökin eru sífellt að leita nýrra félaga.

Uppruni lífsins

Rannsóknir á uppruna lífsins hafa lengi vakið hjá mér áhuga og eru býst ég við ein ástæða þess að ég byrjaði að læra lífefnafræði. Fræg er Miller-Urey tilraunin sem sýndi að við mjög einfaldar aðstæður geta myndast margar af þeim amínósýrum sem eru undirstaða lífvera á Jörðinni. Tilraunin gekk út á að í einangruðu kerfi var líkt eftir lofthjúp Jarðar eins og hann var talinn hafa verið í upphafi (vatn, metan, vetni og ammóníak) og rafneistar látnir leika um gasblönduna. Viku seinna kom í ljós að í blöndunni hafði mikill fjöldi lífrænna efna myndast, þar á meðal amínósýrur sem eru byggingareiningar próteina í lífverum.
Tilraunin sýndi hvernig á mjög einfaldan hátt, líf-efni geta myndast á Jörðinni. Einnig hefur verið sýnt fram á að loftsteinar innihalda oft amínósýrur ásamt öðrum efnum og að líf gæti hafa myndast á Jörðinni útfrá þeim.
Þá hefur fjölliðun á blásýru (HCN) með hitun myndað adenín og fleiri niturbasa sem er uppistaða í bæði í erfðaefninu DNA og RNA en einnig í ATP sem er mikilvæg sameind sem miðlar orku til flestra efnaferla í lífverum.
Mikið hefur einnig verið fjallað um RNA sem forvera erfðaefnis á undan DNA auk þess sem RNA getur virkað sem hvati fyrir ýmis efnahvörf. Sjá meira hér

Eitt vandamál við kenningar um uppruna lífsins hefur samt verið hendni. Hendni er hugtak í lífrænni efnafræði sem þýðir að sameind getur haft t.d. tvær rúm-byggingar. Báðar útgáfur af sameindinni hafa eins atóm og tengi en eru spegilmyndir af hvor annarri. Góð líking er vinstri og hægri útgáfur af hönskum. Við öll venjuleg efnahvörf (eins og í tilraun Millers) myndast alltaf báðir spegilmyndir viðkomandi mólikúls.
Það einkennir lífið að amínósýrur lífvera notast ávallt við aðra spegilmyndina einungis. Þróunarfræðilega er það mjög rökrétt, þar sem að þau ensím sem við þekkjum og hvata efnahvörf lífvera eru oft sértæk á aðra spegilmyndina einungis (eins og vinstri hönd sem passar bara inn í vinstri hanskann); lífið væri trúlega ekki til ef þessi sértækni á hendni hefði ekki orðið til snemma þar sem fjölbreytileiki yrði of mikill.

Árið 2001 var sýnt fram á að kristalyfirborð kalsíumkarbónats (sem er algengt í jarðvegi) getur einnig haft eins konar hendni í kristalplönum sínum og að "vinstri útgáfa" amínósýrunnar asparsýru sogast gjarnan að yfirborði "vinstri-plans" kalsíumkarbonats.
Út frá þessu spratt fram kenning að yfirborð steintegunda getur haft valbundin áhrif á spegilmyndir lífrænna sameinda og gæti þannig hafa gengt mikilvægu hlutverki í fyrstu efnahvörfum lífsins.

Kristalyfirborð eru samt sem áður mjög flókin og tilraunir og útreikningar flóknir í framkvæmd sem þyrfti að framkvæma til að komast að því nákvæmlega hvernig þessi valbundnu áhrif eiga sér stað.
Nú lítur hins vegar út fyrir að örtækniaðferð sem hefur verið vinsæl í líftækniiðnaðinum (DNA-microarraying) kúpluð við TOF-SIMS massagreiningar, sé að fara greiða úr þessu vandamáli. Með aðferðinni má á fljótlegri hátt en áður greina hvaða mólikúl sogast frekar að yfirborði hvers konar kristalplana. Sjá nánari lýsingu á þessu hér

Það verður spennandi að sjá hvað gerist í framhaldi af þessum rannsóknum.

Einnig var ég að komast að því að Háskóli Íslands er að fara bjóða upp á námskeið í Astrobiology eða Stjörnulíffræði á vorönn 2007 en það sem ég fjallaði um hérna að ofan er einmitt oft flokkað undir stjörnulíffræði. Sjá hér
Kennarar í kúrsinum eru þekktir menn eins og Einar H. Guðmundsson (stjörnufræði og eðlisfræði), Guðmundur Eggertsson (líffræði), Guðmundur Hreggviðsson (líffræði), Þröstur Þorsteinsson (jarðvísindi) og Ágúst Kvaran (efnafræði).

nmr nmr nmr...

Er búinn að greina núna yfir 100 NMR róf á 5 dögum og er að verða léttgeðveikur.
Hvað var maður að hugsa þegar maður skráði sig í NMR kúrs ?

----------
Ég var búinn að lofa sjálfum mér að það yrði lítil sem engin pólítík á þessum vef en...
Repúblikanar hafa misst bæði fulltrúadeild (House) og öldungadeild (Senate) í þingkosningum í BNA. Heimurinn á sér þá von eftir allt saman.

Ted Haggard

Hvað veldur því að stærstu kristnu predikarar Bandaríkjanna sem boða bókstafstrú og hatur gegn samkynhneigðum, virðast margir hafa eins og eitt "spöke i garderoben" ?

Ted Haggard er einn þekktasti predikari hinnar kristnu evangelísku kirkju í Bandaríkjunum og hefur verið fyrir mörgum e.k. persónugervingur kristinnar kirkju þar í landi. Hann var stofnandi New Life Church í Colorado Springs og verið þar prestur síðan. Hefur einnig verið í forsæti National Association of Evangelicals og segist hafa náin tengsl við Hvíta húsið og George Bush.
Frægt er orðið viðtal Richard Dawkins við hann í heimildarmyndinni Root of All Evil? sem lýsir kannski dálítið vel hvernig maður Ted Haggard er. Myndbrot úr Root of All Evil?

Eins og margar kristnar kirkjur, sérstaklega í Bandaríkjunum, fordæmir kirkja Ted Haggards samkynhneigð af miklum móð af þeirri einföldu ástæðu að Biblían gerir það, sem er vissulega rétt (Leviticus 20:13 t.d). Ted Haggard hefur síðustu vikur mikið verið að fjalla um samkynhneigð í ræðum sínum sökum þess að greidd verða atkvæði um löggjöf í Colorado fylki um bann við hjónabandi samkynhneigðra samhliða þingkosningum í Bandaríkjunum í þessum mánuði. Myndbrot úr ræðu Ted Haggards

Það er því sérlega kaldhæðnislegt finnst manni að þessi maður skuli lenda í að samkynhneigður fyrrum vændiskarl segir hann hafa stundað kynlíf gegn greiðslu við sig í um 3 ár og verið á methamfetamíni á meðan.
Ted Haggard neitaði þessu öllu fyrst, en í dag (5.nóv) var hann rekinn úr starfi sínu hjá kirkjunni og sjálfur játaði hann að hafa gerst "guilty of sexual immorality".
Sjá grein í CNN
Myndbrot úr Good Morning America

New Life Church gaf í dag út yfirlýsingu og birti einnig bréf Ted Haggards til safnaðar síns (Sjá hér) þar sem hann biðst fyrirgefningar. Sjá hér
Það sem er kannski merkilegast við þetta allt saman (fyrir utan hina gríðarlegu íróníu) er að maðurinn gerði ekkert nema greinilega vera samkynhneigður (ókei, kaup á vændi og eiturlyfjum en gleymum því aðeins) og verandi enn inni í skápnum. En ef maður les bréf hans þá talar hann um saurugar, dimmar og syndugar hugsanir sínar og biðst afsökunar á þeim og kveðst ætla fara í e.k. meðferð gegn þeim. Einhvern veginn finnst manni að hann ætti bara að viðurkenna hver hann er og hætta búa til þetta leikrit í kringum það. Það væri sennilega miklu auðveldara; jafnvel þótt hann kynni að móðga himnadrottinn.

NMR & bjór

Hef komist að því að það að sitja og leysa NMR róf að kvöldi til með bjór við hönd getur bara verið mjög gaman. Mæli með því.

Hrekkjavaka

Hrekkjavaka eða Halloween er sérstök hátíð. Það virðist aðallega haldið upp á hana í enskumælandi löndum og hún á rætur að rekja til Bretlandseyja.

Það var spennandi að upplifa þetta í fyrsta skipti. Nokkrum dögum áður var byrjað að skreyta á ýmsum stöðum, risagrasker voru sett upp í matsalnum hérna í skólanum og fleira. Uppgötvaði að það er merkilegt nokk stórgóð skemmtun að fara niður á markað, finna sér eins stórt grasker og maður mögulega nennir að bera heim og skera það út af miklum móð eins og ég, Auður og Ester gerðum heima hjá Auði á laugardaginn. Já, í alvöru.
Hátíðin í ár var á þriðjudegi sem þýddi að helgin á undan var vinsæl partýhelgi. Aðalfjörið var samt á þriðjudagskvöldinu, alveg sama þótt virkur dagur væri daginn eftir. Lenti í hrekkjavökupartýi þar sem náttúrulega allir voru klæddir í grímubúninga sem maður sér ekki á hverjum degi heima. Ég kannaðist hins vegar við sjarmann við að fara með fríðu föruneyti niður í bæ, uppgötva svo biðraðirnir við alla skemmtistaði, frjósa næstum úr kulda og halda svo aftur heim, Kanada er kannski ekki svo ólíkt Íslandi eftir allt saman.

The God Delusion

Var að enda við að klára mjög góða bók, The God Delusion, eftir Richard Dawkins, þróunarlíffræðing.

Richard Dawkins er orðinn þekktur fyrir andstöðu sína við trúarbrögð og er þetta nýútkomin bók eftir hann þar sem hann fjallar um trúarbrögð heimsins og veltir fyrir sér hvort við höfum eitthvað við þau að gera eftir allt saman. Bókin er komin í 3. sæti á vinsældalista Amazon bókabúðarinnar sem er þónokkuð afrek.
Dawkins hefur einnig gert mjög góðan sjónvarpsþátt, The Root of all Evil ? , sem ég mæli einnig með.

En þessi bók er alveg gríðarlega góð. Ég hef sjaldan lesið jafn vel skrifaða og ótrúlega vel rökstudda bók. Hef sjálfur verið trúlaus lengi og átti svo sem von á því að vera sammála honum í langflestum atriðum, en eftir þessa bók er ég orðinn enn sannfærðari en ég var, um að við verðum að fara losa okkur við trúarbrögð úr samfélagi okkar. Þau hafa engan almennilegan tilgang, byggja á illa rökstuddum grunni, geta komið í veg fyrir framþróun vísinda, geta haft skaðleg áhrif á uppeldi, viðhalda ofsa- og bókstafstrú o.s.frv.

Mæli með þessari bók fyrir bæði trúað fólk og trúlaust fólk, sem sagt alla.