Bergsegulmælingar 

Eyjafjörður-Skagafjörður
Á árunum 1995-99 var safnað sýnum til bergsegulmælinga úr 320 hraunlögum í Eyjafjarðardal og afdölum hans til vesturs. Um er að ræða 3 km þykkan jarðlagastafla, 5-9 milljón ára gamlan. Samstarf var við Ágúst Guðmundsson hjá Jarðfræðistofunni ehf. og fleiri. Grein um niðurstöðurnar birtist í tímaritinu International Journal of Earth Sciences 2004. Svipaðar rannsóknir voru síðan gerðar í inndölum Skagafjarðar á árunum 2002-04 og safnað sýnum úr um 250 hraunum (tæplega 2 km að heildarþykkt) í samstarfi við Ágúst og Árna Hjartarson á Ísor. Grein um þær er nýkomin út í Jökli 56.

Fljótsdalur
Grein um jarðlög Suðurdals og segulmælingar á sýnum úr 76 hraunlögum, rituð í samstarfi við Ágúst Guðmundsson, birtist í Jökli 55 um áramót 2005-06.

Vestfirðir
Á síðastliðnum þrem sumrum (2004-06) hefur verið safnað sýnum úr 260 hraunlögum á svæðinu milli Arnarfjarðar og Breiðafjarðar, til bergsegulmælinga. Þessar rannsóknir eru í framhaldi af öðrum sem ritsmíðar birtust um 1975 og 1984. Grein verður væntanlega rituð um niðurstöðurnar eftir frekari sýnasöfnun og mælingar 2007.

Suðurskautslandið
Í samstarfi við Magnús Tuma Guðmundsson og erlenda vísindamenn voru gerðar segulstefnumælingar á 17 hraunlögum frá Suðurskauts-skaganum. Niðurstöður birtust í grein í tímaritinu Antarctic Science 2005. 

Mars
Haraldur P. Gunnlaugsson við Árósaháskóla og samstarfsmenn hans hafa gert samanburð á tilteknum seguleiginleikum bergs á plánetunni Mars og olivinbasalts frá Íslandi. Tvær greinar þar sem L.K. er meðhöfundur, hafa birst 2005-06. 

Suðurland
Síðastliðið haust var byrjað á litlu verkefni í bergsegulmælingum á hraunlagasniði við Kjósarskarðsveg, um 2 milljón ára. Niðurstöður úr því sniði og úr rannsókn á álíka gömlum jarðlögum í sniði í Þjórsárdal verða birtar 2007-08.

Samantektir
Nýlega hefur birst grein með samantekt ýmissa niðurstaðna um bergsegulmagn og flugsegulmælingar á Íslandi, í samstarfi við Geirfinn Jónsson jarðeðlisfræðing. Greinin er í sérstöku hefti af tímaritinu Journal of Geodynamics ásamt nokkrum öðrum varðandi Ísland.

Af fyrri greinum L.K. um þetta efni má nefna eina í tímaritinu Physics and Chemistry of the Earth 2002. Erindi hafa einnig verið flutt m.a. á þingi American Geophysical Union í San Francisco í des. 2004 og á þingi Internat. Assoc. Geomag.  Aeronomy 2005. Grein um breytileika segulstefna innan hraunlaga, rituð ásamt Haraldi Auðunssyni við Háskólann í Reykjavík, hefur birst í vef útgáfu íslenska ritsins Raust.

Um sögu kennslu og rannsókna í raunvísindum á Íslandi

Á heimasíðunni eru nýlegar eða ný-endurskoðaðar ritsmíðar varðandi m.a.:

- Sögu eðlisfræðikennslu í grunnskólum á Íslandi, til 1995
- Útgáfu bóka um eðlisfræði á Íslandi, til um 1970
- Ritskrár Þorbjörns Sigurgeirssonar og Trausta Einarssonar, ásamt æviágripi þess fyrrnefnda
- Ritstörf George P.L. Walkers og samstarfsmanna, til um 1980
- Leiðangra þýskra jarðvísindamanna til Íslands, 1819-1970
- Ævi Frímanns B. Arngrímssonar raffræðings
- Sögu rannsókna á steindum (einkum geislasteinum) í íslensku bergi, og nafngiftir
- Fjóra norðurljósaleiðangra til Íslands, 1883-1910
- Rannsóknir á og með silfurbergi úr Helgustaðanámunni, einkum á 19. öld 

Um síðastnefnda atriðið hafa verið ritaðar nokkrar greinar, og endurútgáfa fjölritaðrar skýrslu frá 2001 um málefni silfurbergsins er í undirbúningi.