Hvert fór febrúar eiginlega?
Ég þarf nauðsynlega á svona tímaflakkara - eins og frk. Hermione fékk - að halda. Gæti alveg notað ca. 40 tíma á sólarhring og kannski nokkra aukadaga í vikunni.
Annars þá eru helstu markverðu atburðir síðasta mánaðar óperuferðir. Við höfum drifið okkur alls þrisvar sinnum - fyrst að sjá
Adriönu Lecouvreur, þar sem Domingo söng eitt aðalhlutverkið. Það var nokkuð augljóst að maðurinn var vinsæll - fólk byrjaði að klappa um leið og hann steig á sviðið áður en hann náði svo mikið sem að opna kjaftinn. En hann söng nú líka alveg ágætlega.
Næst lá leið okkar á
Il Trovatore - sem er í nokkru uppáhaldi hjá mér því að það er fyrsta óperan sem ég sá (
í Íslensku óperunni vorið 1986). Síðan þá eru ferðirnar orðnar ansi margar - t.d. er þetta í þriðja eða fjórða skiptið sem ég sé trúbadúrinn.
Nú síðast lá leið okkar í gærkvöldi að sjá Kristinn Sigmundsson í
Rusölku eftir Dvorak. Hún er hreint og beint alveg gullfalleg - og sýningin í gær var mjög góð. Þó að söngvararnir fái mesta klappið þá held ég að í þetta skipti myndi ég velja sviðshönnuðinn sem 'besta mann sýningarinnar'. Við náðum svo að hitta Kristinn og Ásgerði eftir sýninguna - og drekka með þeim eins og eitt vínglas - áður en við þustum af stað til að ná síðustu lestinni heim.
Það er nú alveg ágætt að búa í nágrenni NY :)
